第二屆「禁毒領袖學院」活動 - 石鼓洲參觀香港戒毒會

第二屆「禁毒領袖學院LION」第一個活動於2月4日(星期六)正式開始啦～！

當日天氣雖然不似預期有時有少少雨，來自20間中學及8間大學既學員都開開心心換上領袖學院制服齊齊出發！搭船啟程去石鼓洲參觀香港戒毒會～唔講你唔知，石鼓洲唔係人人都可以隨時去架～所以今次可以去到一睹島上風景真係好難得！

學員們一到埗即刻同由戒毒所院友一手一腳建立既「林則徐像」打個卡～之後就係禮堂進行熱身遊戲，同聽下戒毒所社工同院友既戒毒經驗分享。緊接住一路上山參觀各個院舍一邊聽導遊介紹島上戒毒生活，然後親自餵餵小羊食大樹波羅葉、了解一下魚菜共生如何運作、一覽石鼓洲人工島同埋自家儲水庫，仲有參觀戒毒所內院友宿舍。

離開前，大家都好有愛心，導師同學員們齊齊落手落腳幫忙清潔執拾沙灘垃圾，希望還原返個靚靚沙灘，發揮互助精神！

另外，非常感謝YDAHK陳家成、陳家安理事今年繼續為LION擔任顧問導師、同多謝香港戒毒會今次開放俾學員們參觀，仲送左精美紀念品比一班學員們。完成左行程後，佢地仲一齊去左長洲午餐，食下長洲出名既大魚蛋、糕點，真係好充實好開心～！